'എന്താ എന്‍ബീ, ഇങ്ങനെ മേശപ്പുറത്തുകയറി ചമ്രം പടിഞ്ഞ് ചിന്തന്‍ ബൈഠക്കിലിരിക്കുന്നത്?''
'മ്മ്‌ടെ സഹരാജന്‍ നായര്‌ടെ കാര്യം ചിന്തിച്ചുപോയതാണ്. അങ്ങേരൊരു മണ്ടനാണ്‌ട്ടോ. പറയാതിരിക്കാന്‍ വയ്യ.''
'ഭേഷ്! ഒരാളെങ്കിലും അത് പറഞ്ഞല്ലൊ. ഞാന്‍ ധന്യനായി. ആട്ടെ, എന്തേ തിരുമേനിക്ക് പെട്ടെന്നിങ്ങനെ തോന്നാന്‍?''
'അതേയ്, ഇന്നലെ പുള്ളിക്കാരന്‍ എന്നെ വിളിച്ചിട്ട് പറഞ്ഞു: തിരുമേനീ, ഞാന്‍ വീട് മാറാന്‍ പുവ്വാ. അതുകൊണ്ട് എന്റെ പഴയ വീട്ടിലെ ടെലിഫോണ്‍ കോലോത്തുംപാടത്തെ ബി എസ് എന്‍ എല്‍ ആപ്പീസില് കൊണ്ടുകൊടുക്കണം. എന്നിട്ട് അവിടെന്ന് ഒരു കടലാസ് വാങ്ങിച്ച് അവര്‌ടെ ചെമ്പൂക്കാവിലെ ആപ്പീസില് കൊടുക്കണം. ബുദ്ധിമുട്ടാവില്ലെങ്കില്‍ എന്‍ബീടെ ബൈക്കില്‍ എന്നെയൊന്ന് കൊണ്ടുപോകാമോ?
ബുദ്ധിമുട്ടൊന്നുമില്ലെന്നും പറഞ്ഞ് ഞാന്‍ ബൈക്കുമെടുത്ത് നായര്‍ജിയേയും കൂട്ടി കോലോത്തും പാടത്തേക്ക് വിട്ടു. ഇന്‍സ്ട്രുമന്റ് അവിടെ സറണ്ടര്‍ ചെയ്തശേഷം അവിടെന്ന് കടലാസും വാങ്ങി നേരെ ചെമ്പൂക്കാവിലേക്കും പോയി. തിരിച്ച് വടക്കേസ്റ്റാന്റ് വഴി ആപ്പീസിനടുത്തുള്ള പെട്രോള്‍ പമ്പിനടുത്തെത്തിയപ്പോഴാണ് ഒരു ഞെട്ടലോടെ ഞാന്‍ ആ കാര്യമോര്‍ത്തത്: ചെമ്പൂക്കാവില്‍നിന്ന് ബൈക്കെടുക്കാന്‍ മറന്നുപോയി! ഞാന്‍ നായര്‍ജിയോട് വിവരം പറഞ്ഞു. ആലോചിച്ച്‌നില്‍ക്കാനൊന്നും നേരല്ല്യല്ലൊ. നിന്നാല്‍ വണ്ടി ആരെങ്കിലും പൊക്കും. പിന്നെ സാക്ഷാല്‍ പൊക്കുടന്‍ വന്നാലും സാധനം കിട്ട് ല്ല്യ. അങ്ങനെ ഞങ്ങള്‍ രണ്ടാളും കൂടി രണ്ടാമതും ചെമ്പൂക്കാവിലേക്ക് വിട്ടു…''
'തിരുമേനി ഇത്രയൊക്കെ വിസ്തരിച്ചിട്ടും നായര്‍ജി എന്ത് മണ്ടത്തരമാണ് കാണിച്ചതെന്ന് എനിക്ക് മനസ്സിലായില്ല്യാട്ടോ.''
'അതേയ്, ഇത്രയ്ക്ക് നടുവേദനയും ഡിസ്‌ക്‌പ്രോബ്ലവുമൊക്കെയുള്ള ഒരാള്‍ ടൂവീലറിന്റെ പുറകിലിരുന്ന് കുത്തിക്കുടുങ്ങി രണ്ടാമതും ചെമ്പൂക്കാവുവരെ വരേണ്ട വല്ല കാര്യവുമുണ്ടായിരുന്നോ? നായര്‍ജിക്ക് ആ പെട്രോള്‍ പമ്പിലിറങ്ങി നേരെ ഇങ്ങോട്ട് പോന്നാപ്പോരായിരുന്നോ? വണ്ടി ഞാന്‍ തനിച്ചുപോയി എടുത്തോണ്ടുവരുമായിരുന്നില്ലേ?'' !!!
'ഇപ്പൊ മനസ്സിലായി. നായര്‍ജി ഒരു മണ്ടന്‍ തന്നെ. ആട്ടെ. നിങ്ങള്‍ ചെന്നപ്പൊ ബൈക്ക് അവിടെത്തന്നെ ഉണ്ടായിരുന്നോ? ''
'ബൈക്കെവിടെപ്പോകാന്‍? അതില്‍ തന്നെയല്ലേ ഞങ്ങള്‍ രണ്ടാമതും ചെന്നത്. ''
'അപ്പോള്‍ പിന്നെ മറന്നുവെച്ചൂന്ന് പറഞ്ഞത്... ''
'ഓ. അത് എനിക്ക് ചെറിയൊരു ഓര്‍മ്മപ്പെശക് പറ്റീതാ '' !!!
No comments:
Post a Comment