കരിമീൻ ഫെസ്റ്റ് !
-ഹലോ, എം ജി ആർ സാറല്ലേ
-ഏ...
-എം.ജി.ആർ സാറാണോ?
-അതേലോ
-അപ്പൊ ചെവി പണ്ടത്തെപ്പോലെ തന്നെ.
അല്ലേ
-ഏ....
-ഒന്നൂല്ല്യ. ഇത് ബിആറാണ്. റിട്ടയർമെന്റ്
ജീവിതൊക്കെ എങ്ങനെ പോകുന്നു സാർ?
-പരമസുഖം. പരമാനന്ദം.
-നേരമ്പോക്കിന് എന്തു ചെയ്യുന്നു?
-വല്ലതുമൊക്കെ വായിച്ചിരിക്കും. ച്ചാൽ
വായിച്ച്ചിരിക്കും
-അതു കള! ഞാനും അതാണ് പറയാറുള്ളത്...
-ഏ...എന്തെങ്കിലും പറഞ്ഞോ?
-ഇല്ല്യേയ് (വൈൻഡപ്പ് ചെയ്യാന്നാ തോന്നണേ!).
ആട്ടെ, സാറിന്റെ
ലഞ്ചൊക്കെ കഴിഞ്ഞോ?
-കഴിഞ്ഞു
-എന്തായിരുന്നു ഉപദംശം?
-കരിമീൻ
-എന്റെ നാവിൽ വെള്ളമൂറുന്നു
-ഓ.. ഇവിടെ അത് പുത്തരിയൊന്നുമല്ല.
മിക്കവാറും എല്ലാ ദിവസോം ഉച്ചയ്ക്ക് കരിമീനുണ്ടാവും.
-ഭാഗ്യവാൻ! എന്തായാലും ഭാരതിച്ചേച്ചിയെ
സമ്മതിക്കണം. എന്നും ഇങ്ങനെ കരിമീൻ വെച്ചുണ്ടാക്കാൻ എന്തു പാടായിരിക്കും
-ഏയ്. ഒരു പാടൂല്ല്യ. അവൾക്കത് ശീലായി.
വെറും അര മണിക്കൂറോണ്ട് ചെയ്യും.
-പാചകരഹസ്യം പുറത്തുവിടുന്നതിൽ വിരോധമില്ലെങ്കിൽ
ഒന്നു പറഞ്ഞുതന്നാൽ കൊള്ളാം.
-റെസിപി കൃത്യമായിട്ട് എനിക്കറിയില്ല. വേണെങ്കി അവള് ചെയ്യണ
കാര്യം ഞാൻ പറഞ്ഞുതരാം
-അതു മതി. അതുമതി
-എന്നും രാവിലെ ഒരു പത്തരയാവുമ്പൊ പുള്ളിക്കാരി
മീൻ നന്നാക്കാൻ തൊടങ്ങും. അത് കഴുകി വൃത്തിയാക്കി
നാലിഞ്ച് നീളമുള്ള കഷണങ്ങളാക്കി മുറിച്ച് ചട്ടിയിലിടും. പിന്നെ മുളകുപൊടി, മല്ലിപ്പൊടി,
കറിയുപ്പ് (ആവശ്യത്തിന്), ചുവന്നുള്ളി, വെള്ളുള്ളി (അനാവശ്യത്തിന്), മസാല മുതലായവ പുരട്ടും. ഒരു പത്തുമിനിറ്റ് അതങ്ങനെ ഇരിക്കും. ഇതിനിടയ്ക്ക്
എന്തോ ഒരു മൂളിപ്പാട്ട് പാടണ കേക്കാം. അതിനുശേഷം അടുപ്പത്ത് ചീനച്ചട്ടി വെച്ച് 2 കരണ്ടി
വെളിച്ചെണ്ണയൊഴിക്കും. അത് ചൂടാകുമ്പൊ മീൻ കഷണങ്ങൾ ഓരോന്നായി അതീവ ശ്രദ്ധയോടെ അതിൽ
നിക്ഷേപിക്കും. അനന്തരം ഒരു മൂടിയെടുത്ത് ഭദ്രമായി മൂടി അത് വേവാൻ വെയ്ക്കും. അന്നേരം
ഹാളിലെ ക്ലോക്കിൽ മണി പതിനൊന്നടിക്കും. ആ അടി കേക്കുന്നതും അവൾ ഹാളിലേക്കോടും. പിന്നെ
11.30ന് തിരിച്ചുവരുമ്പോഴേക്കും ചട്ടിയിലിട്ടത് വെറും പിലോപ്പിയായാൽ പോലും അത് കരിമീൻ
ആയിട്ടുണ്ടാവും!!!
-ശ്ശെടാ! അപ്പൊ 11 മുതൽ 11.30 വരെ ഈ
ചേച്ചി എന്തെടുക്ക്വാണ്?
-എന്റെ മാഷേ, അപ്പോഴല്ലേ ഏഷ്യാനെറ്റിലെ
സീതാകല്യാണം? !!!
