( കൃഷ്ണകുമാര് അയച്ചുതന്ന ഒരു കാര്ട്ടൂണിനെ അവലംബിച്ചെഴുതിയത്)
മാര്വെല് ചിക്കന് ഫാമിലെ എംപ്ലോയീസായ മുഴുവന് കോഴികളുടേയും യോഗം വിളിച്ചുചേര്ത്ത് മാനേജിംഗ് ഡയരക്ടര് പറഞ്ഞു:
''ദ ഡയരക്ടര്ബോഡ് നോട്സ് വിത്ത് ഗ്രെയ്റ്റ് കണ്സേണ് ദാറ്റ് യുവര് പെര്ഫോമന്സ് ഈസ് നോട്ട് അപ്റ്റു ദ മാര്ക്ക്. അതുകൊണ്ട് നാളെ മുതല് നിങ്ങള് ഓരോരുത്തരും ഒന്നിനുപകരം രണ്ടു മുട്ട വീതം
ഇടണം '' !
എന്തു ഭോഷ്കാണ് ഈ എംഡി പറയുന്നത്? കാര്യം മനസ്സിലാക്കാന് കഴിയാതെ കോഴികള് കഴുത്തുയര്ത്തി പരസ്പരം കണ്ണുമിഴിച്ചുനോക്കി.
ചിലര് കൊക്കൊ...കൊക്കൊക്കൊ എന്ന് ഗദ്ഗദപ്പെട്ടു.
എംഡി തുടര്ന്നു: ''കണ്ണുമിഴിച്ചിട്ടും ഗദ്ഗദപ്പെട്ടിട്ടും മറ്റും കാര്യമില്ല. കമ്പനിയുടെ പോളിസി നിങ്ങള്ക്കറിയാമല്ലൊ. ഹയര് ആന്ഡ് ഫയര്. അത് ഓര്മ്മ വേണം.''
യോഗം പിന്നെ അധികനേരം നീണ്ടുനിന്നില്ല..........
പിറ്റേന്ന് ഫാം ഇന്സ്പെക്റ്റ് ചെയ്യാന് വന്ന എംഡി മൊത്തത്തില് സന്തോഷവാനായി കാണപ്പെട്ടു. കാരണം അതുവരെ അദ്ദേഹം എണ്ണിയ കോഴികളെല്ലാം തന്നെ ഈരണ്ട് മുട്ടകള് വീതം ഇട്ടുവെച്ചിരുന്നു!
''ഗുഡ് പെര്ഫോമന്സ്''- എംഡി ആത്മഗതം പറഞ്ഞു.
പക്ഷേ അടുത്തതായി എണ്ണിയ കോഴി ഒറ്റ മുട്ടയേ ഇട്ടിരുന്നുള്ളു...
ദേഷ്യം കൊണ്ട് ചുവന്ന കണ്ണുകളോടെ എംഡി ചോദിച്ചു:
'' എന്തേ ഒറ്റ മുട്ട മാത്രം ? നിങ്ങള് ഇവിടെന്ന് പിരിഞ്ഞുപോകാന് തീരുമാനിച്ചോ? ''
''ഇല്ല സാര് '' പ്രതിയായ കോഴി പറഞ്ഞു.
''പിന്നെ?''
''ഈ ഒരു മുട്ട തന്നെ എങ്ങനെയാണ് ഇട്ടതെന്ന് എനിക്കു മാത്രമേ അറിയൂ. അത്രയ്ക്ക് വിഷമിച്ചുപോയി. പിന്നെ പെര്ഫോമന്സ് അപ്രൈസലിന്റെ പ്രെഷറ് കാരണം ഏതുവിധേനയും ഒരെണ്ണം ഇട്ടെന്നേയുള്ളൂ.''
'' എന്താ മറ്റാര്ക്കുമില്ലാത്ത വിഷമം നിങ്ങള്ക്കു മാത്രം? '' എംഡിക്ക് കോപം അടക്കാനായില്ല.
''അതുകൊണ്ടല്ല സാര്''
''പിന്നെ എന്തുകൊണ്ടാണെന്നാണ് ചോദിച്ചത് ''
''ഈ സാറൊരു മണ്ടന് തന്നെ. ഞാനൊരു പൂവങ്കോഴിയല്ല്യോ?'' !!!
No comments:
Post a Comment