ബുദ്ധിമാനായ എന്‍ബി

ഇംഗ്ലീഷ് ഗുളിക കഴിക്കാന്‍ ഭയങ്കര മടിയാണ് എന്‍ബി പരമേശ്വരന്റെ പുത്രനും അഞ്ചുവയസ്സുകാരനുമായ വിഷ്ണുവിന്.
ഗുളികയുടെ കയ്പ് തന്നെ കാരണം.
ഒരിക്കല്‍ എന്തോ ഒരു ചെറിയ അസുഖം വന്നപ്പോള്‍ ഡോക്ടര്‍ ഏതോ ഒരു ഗുളികയെഴുതി.
1 വീതം 3 നേരം കഴിക്കണം.
ഇവനെക്കൊണ്ട് ഇതെങ്ങനെ കഴിപ്പിക്കും- അതായി സാവീടെ വേവലാതി.
വഴിയുണ്ട് - എന്‍ബി പറഞ്ഞു. (അച്ഛനാരാ മോന്‍!)
എന്‍ബി ബൈക്കുമെടുത്ത് പുറത്തേക്കുപോയി.
10 മിനിറ്റുകഴിഞ്ഞപ്പോള്‍ കൈയില്‍ ഒരു പാക്കറ്റ് രസഗുളയുമായി തിരിച്ചുവന്നു.
പിന്നെ പാക്കറ്റുതുറന്ന് ഒരു രസഗുളയെടുത്ത് അതില്‍ ഉപായത്തില്‍ ഒരു തുളയുണ്ടാക്കി വിഷ്ണുവിന് കഴിക്കാനുള്ള ഗുളിക പുറമേയ്ക്ക് കാണാനാവാത്ത വിധത്തില്‍ അതില്‍ നിക്ഷേപിച്ചു ! പിന്നെ ഒരു പ്ലേറ്റില്‍ അത് ഡൈനിംഗ് ടേബിളില്‍ വെച്ചു. എന്നിട്ട് വിഷ്ണുവിനെ വിളിച്ച് പറഞ്ഞു: വിഷ്ണൂ, ദേ അച്ഛന്‍ നിനക്ക് ഒരു രസഗുള വാങ്ങിക്കൊണ്ട്വന്ന്ട്ട് ണ്ട്. എടുത്ത് കഴിച്ചോളൂ.
ഇതുകണ്ടതും ഇപ്രകാരമാലോചിച്ച് സാവീടെ കണ്ണു നിറഞ്ഞുപോയി : എത്രയെത്ര കല്യാണാലോചനകള് വന്നതാണെനിയ്ക്ക്. അതില്‍നിന്ന് ഇത്രയും ബുദ്ധിമാനായ ഒരാളെ തെരഞ്ഞുപിടിച്ച് ദൈവം എനിക്ക് തന്നല്ലൊ! മുജ്ജന്മ സുകൃതം ! ......................

ഏതാണ്ടൊരു പത്തുമിനിറ്റ് കഴിഞ്ഞപ്പോള്‍ എന്‍ബി വിഷ്ണുവിനെ വിളിച്ച് അന്വേഷിച്ചു:
-വിഷ്ണൂ, നീ രസഗുള കഴിച്ച്വോ?
-ഉവ്വ്
-എങ്ങനീണ്ടായിരുന്നു?
-നല്ല രസണ്ടായിരുന്നു. പിന്നീണ്ട്‌ല്ലൊ അച്ഛാ, അതിന്റെ കുരൂന് ഭയങ്കര കയ് പ്പാ.
അത് ഞാന്‍ തുപ്പിക്കളഞ്ഞു !!!