കോപിഷ്ഠന്‍

-മിസ്റ്റര്‍ ആന്റണ്‍ വില്‍ഫ്രഡ്, താങ്കളെന്താണിങ്ങനെ ഒറ്റയ്ക്കിരുന്ന് ചിരിക്കുന്നത്?
-മനുഷ്യന്റെ ഓരോ കാര്യങ്ങളോര്‍ത്ത് ചിരിച്ചുപോയതാണ്.
-അതോര്‍ക്കാന്‍ മാത്രം ഇപ്പോളെന്താണുണ്ടായത്?
-അതുപിന്നെ ചിലര്‍ക്ക് ദേഷ്യം വന്നാല്‍ ഇന്നതേ ചെയ്യുള്ളൂന്ന് ല്ല്യ. അല്ലേ ബിആര്‍?
-ചിലരങ്ങനെയാണ്. ദേഷ്യം വന്നാപ്പിന്നെ പരിസരബോധണ്ടാവില്ല്യ.
-അതെ. അതുതന്നെയാണ് അതിന്റെ വാക്ക്. പരിസരബോധം.
-നമ്പ്യാരാശാന്‍ ഏതോ തുള്ളല്‍ക്കഥയില്‍ അത് കൃത്യമായി വരച്ചുവെച്ചിട്ടുണ്ട്.
-അതെങ്ങനെയായിരുന്നു? ഞാന്‍ മറന്നുപോയി.
-'നായര്‍ വിശന്നുവലഞ്ഞുവരുമ്പോള്‍
കായക്കഞ്ഞിയ്ക്കരിയിട്ടില്ല!''
-അതെയതെ. അന്നേരം പടനായര്‍ എന്തുചെയ്‌തെന്നാണ്?
-'കെട്ടിയ പെണ്ണിനെ മടികൂടാതെ
കിട്ടിയ വടികൊണ്ടൊന്നു കൊമച്ചു
അതുകൊണ്ടരിശം തീരാഞ്ഞവനാ-
പ്പുരയുടെ ചുറ്റും മണ്ടിനടന്നു!''
-ഇദ്ദേഹവും അങ്ങനെയൊക്കെ ചെയ്തിട്ടുണ്ടാവുമന്നാണ് എനിക്കു തോന്നുന്നത്.
-ആരുടെ കാര്യമാണ് ആന്റണ്‍ പറയുന്നത്?
-എന്റെ ഒരു സുഹൃത്തിന്റെ.
-സുഹൃത്തിനെന്തിനാണ് കോപം വന്നത്?
-രാവിലെ കൃത്യം എട്ടേമുക്കാലിന് പുള്ളിക്കാരന്‍ കുളിക്കാന്‍ കേറുന്നു. കുളിച്ചിറങ്ങിയശേഷം ആപ്പീസില്‍ പോകാനായി ഷര്‍ട്ടിടാന്‍ നോക്കുമ്പോള്‍ അലമാരി കാലി! ഒരൊറ്റ ഷര്‍ട്ടില്ല. അന്നേരം പുള്ളിക്കാരന് ഭാര്യയോട് ഇത്രയ്‌ക്കേ കലി വന്നുള്ളൂന്ന് ല്ല്യ.. നമ്പ്യാര് പറഞ്ഞപോലെ കലികൊണ്ട് പരിസരബോധം നഷ്ടപ്പെട്ട ചങ്ങാതി അവിടെയൊക്കെ പാഞ്ഞുനടന്നു. ആ പാച്ചിലിനിടയ്ക്കാണ് നല്ല വള്ളിയും പുള്ളിയും തിളക്കവും മറ്റുമുള്ള ഒരു പുത്തന്‍ ചുരിദാര്‍ പുള്ളിക്കാരന്റെ ദൃഷ്ടിയില്‍ പെടുന്നത്. ഭാര്യയ്ക്ക് അന്ന് ഓഫീസില്‍ പോകുമ്പോള്‍ ഇടാന്‍ വേണ്ടി വെച്ചിരിക്കുന്നതാണ്. ഇനി പറയൂ, അന്നേരം അദ്ദേഹം എന്തു ചെയ്തിട്ടുണ്ടാവുമെന്നാണ് ബിആര്‍ കരുതുന്നത്?
-ദേഷ്യം കാരണം അതെടുത്ത് ഒളിപ്പിച്ചുവെച്ചിട്ടുണ്ടാവും.
-അല്ല. അതല്ല ഉണ്ടായത്. 'അത് ശെരി, ആപ്പീസില്‍ പോവാന്‍ എനിക്ക് ഷര്‍ട്ടില്ല. എന്നാല്‍ ഇവള്‍ ഇത് ഇട്ടോണ്ട് പോണത് ഒന്നുകാണട്ടെ' എന്നും പറഞ്ഞ് പുള്ളിക്കാരന്‍ ആ ചുരിദാറെടുത്ത് സ്വയമങ്ങണിഞ്ഞു! പിന്നെ ബൈക്കുമെടുത്ത് ശരം വിട്ടപോലെ ആപ്പീസിലേക്ക് വിട്ടു!
-കൊള്ളാം. ചുരിദാറിനൊപ്പം വേറൊരു സാധനമുണ്ടല്ലൊ, അതും ധരിച്ചോ?
-അതെന്താണ്?
-കഴുത്തിലൊരു ചുറ്റുചുറ്റി പുറകിലേക്കിടണത്!
-ഷാള്‍. അല്ലേ?
-അതന്നെ.
-ഇല്ല. അത് ചുരുട്ടിക്കൂട്ടി അലമാരിയിലേക്കിട്ടിട്ടാണ് ആപ്പീസിലേക്ക് പാഞ്ഞത്.
-അത് ശെരി. അതുപോട്ടെ. ആരാണാ സുഹൃത്ത്?
-ആരോടും പറയരുത്.
-ഇല്ല.
-എഴുതുകയുമരുത്.
-ഇല്ലില്ല.
-മ്മ്‌ടെ രാജേന്ദ്രന്‍!